நடுத்தர வர்க்கத்தின் உளவியல் தத்தளிப்புகளையும் சமூகம் கட்டமைத்துள்ள மூடநம்பிக்கைகளையும் பதிவுசெய்து வருபவர்களில் எழுத்தாளர் ம. காமுத்துரை குறிப்பிடத்தக்கவர். இவரது ‘அடுத்து’ எனும் சிறுகதை, திருமண வயது வந்த தன் மகனுக்குப் பெண் தேடி அலையும் நடுத்தர வர்க்கத் தந்தையின் (தணிகாசலம் பிள்ளை) வாழ்வியலை மையமாகக் கொண்டு கட்டமைக்கப்பட்டுள்ளது.
ஜாதகப் பொருத்தங்கள், ஜோதிடக் கணக்குகள், தரகர்களின் ஏமாற்று வேலைகள் மற்றும் உறவு முறைகளின் அகந்தைகள் ஆகியவற்றுக்கு நடுவில் சிக்கித் தவிக்கும் ஒருவனின் வாழ்க்கையை, கிராமியப் பின்னணியில் இயங்கும் அன்னஞ்சி நாயக்கர் என்ற பாத்திரத்தின் ஊடாகச் செறிவாக இக்கதை பேசுகிறது.
கதையின் மையக் கதாபாத்திரமான தணிகாசலம் பிள்ளை, சமூகத்தின் கவுரவத்தையும் அந்தஸ்தையும் காப்பாற்றத் துடிக்கும் சராசரி நடுத்தர வர்க்க மனிதன். மூத்த மகனுக்குப் பெண் தேடி முப்பதைத் தாண்டிய அனுபவம் இவனுக்கு இருப்பதால், இளைய மகனுக்காவது இருபத்தைந்து வயதிலிருந்தே ஜாதகத்தைத் தயார் செய்து தீவிரமாக இறங்குகிறான்.
மகனின் கல்வி மற்றும் குடும்பப் பின்னணிக்கு ஏற்ப, வரதட்சணை மற்றும் நகைக் கணக்குகளை மனதுக்குள் அளந்து பார்க்கும் இவனது குணம் நடுத்தர வர்க்கத்தின் பொதுவான மனோபாவத்தை வெளிப்படுத்துகிறது.
தென்காசி, ஈரோடு, வேலூர் என மாவட்டம் தாண்டி ஜாதகங்களை அனுப்புவதும் தரகர்களுக்குப் பணம் கொடுப்பதும் ஆன்-லைன் ஜாதகங்களை அலசுவதுமாக இவனது வாழ்க்கை சக்கரமாகச் சுழல்கிறது. ஆனால், இந்தத் தேடல் எங்குமே மனிதனுக்கும் மனிதனுக்கும் இடையிலான புரிதலை மையமாகக் கொள்ளாமல், நட்சத்திரப் பொருத்தங்களையும் கிரக நிலைகளையும் மட்டுமே சார்ந்து நிற்பதுதான் இதன் துயரமாகும்.
இக்கதையின் முக்கியமான விவாதப் பொருள் ஜோதிடமும் அதன் பெயரால் எளிய மக்கள் ஏமாற்றப்படுவதுமே!. பிள்ளையின் தேடல் முழுவதும் ஜாதகக் கட்டுகளுக்குள்ளேயே முடங்கிப்போகிறது.
“பையனுக்குச் சாதகத்தில் ஏதோ தோஷம் இருக்கும் தாயி” என்று கோவில் பூசாரி சொல்லும் ஒரு வார்த்தையை நம்பி, புத்துக் கோவிலுக்குப் பால் ஊற்றுவது, கன்னிப் பெண்களுக்கு ரவிக்கை தானம் செய்வது, மாவட்டம் விட்டு மாவட்டம் கோவில்களுக்கு அலைவது எனச் சாவித்திரியும் (பிள்ளையின் மனைவி) பிள்ளையும் படும் பாடு மூடநம்பிக்கையின் உச்சமாகும்.
ஜோதிடத்தின் பெயரால் நடக்கும் வணிகத்தை அன்னஞ்சி நாயக்கர் மிக இயல்பாக உடைக்கிறார். “புத்திக்குத் தெரியுது சாதகம் ஒண்ணுமில்லேன்னு. ஆனா எதோவொரு அச்சம் பேயா ஆட்டிவச்சு அறிவை மறைக்கிதுல்ல” என்று நாயக்கர் உதிர்க்கும் வார்த்தைகள், மனித மனங்களை ஆளும் உளவியல் அச்சத்தின் ஆழத்தைக் காட்டுகின்றன. நட்சத்திரம் பொருந்தியிருந்தால் போதும் என்ற அவரது எளிய அணுகுமுறை, சிக்கலான ஜோதிடக் கணக்குகளை நொருக்குவதாக அமைகிறது.
பெண் தேடும் படலத்தில் ஜோதிடர்களைத் தாண்டி உறவினர்களின் தலையீடும் சமூக அந்தஸ்தும் எவ்வாறு வேலை செய்கின்றன என்பதை இக்கதை சாத்தூர் பெண் பார்க்கும் படலத்தின் மூலம் விளக்குகிறது.
சின்னமனூர் செல்வியின் ஜாதகம் பொருந்தி, டவேரா காரில் சென்று பெண் பார்க்கும் படலம் மகிழ்ச்சியாக முடிகிறது. பங்காளிகளில் மூத்தவரான தில்லை நாயகம் அண்ணன் முன்னின்று பேசி எல்லாவற்றையும் உறுதி செய்கிறான்.
ஆனால், தில்லை அண்ணன் தன் செல்வாக்கைக் காட்டப் போய், கடந்த காலத்தில் அவர் செய்த ஊர்ப் பஞ்சாயத்துத் தகராறால் அந்த நல்ல சம்பந்தமே கைநழுவிப் போய்விடுகிறது. மாப்பிள்ளை தில்லை வகையறா என்ற காரணத்திற்காகவே பெண் வீட்டார் சம்மந்தத்தைத் திருப்பி அனுப்பிவிடுவதில், சாதிய மற்றும் குடும்ப உறவுகளின் அகந்தை வெளிப்படுகிறது. தனிமனிதனின் தகுதியைவிட, அவன் சார்ந்திருக்கும் கூட்டத்தின் பகைகளே ஒருவனின் வாழ்க்கையைத் தீர்மானிக்கின்றன என்ற சமூக யதார்த்தம் இங்கு வெளிப்படுத்தப்படுகிறது.
கதையின் தலைப்பாக அமைந்துள்ள ‘அடுத்து’ என்பது வெறும் சொல்லன்று; அது மனிதனின் முடிவற்ற ஆசைகளையும் ஓட்டத்தையும் குறிக்கும் குறியீடு.
ஒரு சம்பந்தம் கைநழுவிப் போனாலும் சற்றும் தளராமல் அடுத்த ஜாதகத்தைத் தேடும் தணிகாசலம் பிள்ளையின் மனநிலை வியப்பானது. கதையின் இறுதியில், முந்தைய தோல்விகளுக்கான சோகம் முகத்தில் இருந்தாலும், கடைக்கு வேறுசில மனிதர்கள் ஜாதகம் பார்க்க வருவதும், பிள்ளை மீண்டும் தன் குறிப்புப் புத்தகத்தை எடுப்பதும் வாழ்க்கையின் சக்கரம் நிற்பதில்லை என்பதை உணர்த்துகிறது.
என்னதான் ஏமாற்றங்களும் இழப்புகளும் ஏற்பட்டாலும், “சாமீ…! பையனுக்கு சாதகம் பாக்கணும்!” என்று அடுத்த கட்டத்திற்கு நகரும் மனித இயல்பு, நம்பிக்கையின் பெயரால் தன்னைத்தானே ஏமாற்றிக்கொள்ளும் தொடர் ஓட்டத்தின் வெளிப்பாடாகும்.
எழுத்தாளர் ம. காமுத்துரையின் ‘அடுத்து’ சிறுகதை, நடுத்தர வர்க்கத்தின் திருமணத் தேடல்களையும் அதன் ஊடாக வெளிப்படும் ஜோதிட மூடநம்பிக்கைகளையும் உறவுமுறைகளின் அரசியலையும் காட்டியுள்ள படைப்பாகும்.
தனிமனித வாழ்வியலின் சிக்கலான முரண்களையும் யதார்த்தத்தின் பிடியில் சிக்கித் தவிக்கும் மனிதர்களின் உளவியலையும் சுவாரஸ்யமாகப் பேசும் இக்கதை, இன்றைய நவீனச் சமூகத்தில் கட்டாயம் வாசிக்கப்பட வேண்டிய முக்கியமான படைப்பு.
– – –