கிராமியச் சூழலில் விளிம்புநிலை மனிதர்களின் உளவியலையும் மூடநம்பிக்கைகளின் பின்னணியில் இயங்கும் போலிஆன்மிகத்தையும் ‘தொக்கம்’ எனும் சிறுகதையில் துல்லியமாகப் பதிவுசெய்துள்ளார் எழுத்தாளர் நெய்வேலி பாரதிக்குமார்.
இந்தச் சிறுகதை பதின்பருவத்து இளமைத் துடிப்பில் தவறான கூட்டுறவால் வழிதவறிப் போகும் சிறுவனின் (தங்கப்பாண்டி) கதையை மையமாகக் கொண்டு கட்டமைக்கப் பட்டுள்ளது.
உடல்நலக்குறைவை மருத்துவரிடம் தீர்க்காமல், ‘தொக்கம்’ பார்க்கும் மூக்கையாவின் உதவியை நாடும் கிராமியச் சமூகத்தின் உளவியலையும் அந்த மூக்கையாவே தனது கடந்த காலத் தவறுகளிலிருந்து கற்றுக்கொண்ட பாடத்தை அச்சிறுவனுக்கு உணர்த்துவதையும் இக்கதை செறிவாகப் பேசுகிறது. தனிமனித வாழ்வியல் நெறிகளையும் நடுத்தர வர்க்கத்துப் பதின்பருவச் சிக்கல்களையும் அடித்தளமாகக் கொண்டு இக்கதையை விரிகிறது.
கதையின் நாயகனான தங்கப்பாண்டி, தாயை இழந்தவன்; தந்தையின் கடுமையான கண்டிப்புக்கு அஞ்சியவாறு வளரும் எளிய கிராமத்துப் பையன். அவனது வயதுக்குரிய அறியாமையும், சக நண்பர்களின் துணையோடு புதிய அனுபவங்களைத் தேடும் ஆர்வமுமே அவனைச் சீரழிக்கின்றன.
மாணிக்கம் போன்ற நண்பர்களின் பழக்கம் அவனுக்குப் புகைபிடிக்கும் பழக்கத்தையும் போதைப் பொருட்களின் உலகத்தையும் அறிமுகப்படுத்துகிறது. “மாணிக்கம் அவனோடு பழகுவதற்கும் முன் இப்படி எல்லாம் துணிச்சல் வந்ததில்லை” என்ற வரி, ஒருவனின் வாழ்வை மாற்றுவதில் நண்பர்களின் பங்கு எத்தகையது என்பதை விளக்குகிறது.
முறையற்ற பழக்கவழக்கங்களாலும் போதைப் பொருட்களாலும் பாதிக்கப்பட்டு, வாந்தியும் வயிற்றுவலியும் எடுத்துத் தள்ளாடும் அவனது நிலை, இன்றைய நவீன இளைஞர்கள் தவறான வழிகளில் சிக்கித் தவிக்கும் அவலத்தின் குறியீடாகும்.
இக்கதையின் முக்கியமான முகம் கிராமியச் சமூகத்தின் மூடநம்பிக்கையும் போலி வைத்தியர்கள் மீது அது கொண்டுள்ள கண்மூடித்தனமான நம்பிக்கையுமாகும்.
கால்கள் தளர்ந்துபோய், முடங்கிக்கிடக்கும் மூக்கையா, வெளியூர்களில் இருந்து வரும் எளிய மக்களால் சாமியாராகப் பார்க்கப்படுகிறான். அவன் வாயிலிருந்து கல், தகடு, தலைமுடி போன்றவற்றை ‘தொக்கம்’ பார்த்து எடுப்பதாகச் சொல்லப்படும் கட்டுக் கதைகள், எளிய மக்களின் அறியாமையைச் சுரண்டும் வியாபாரத்தின் வெளிப்பாடாகும்.
தங்கப்பாண்டியின் மீது எல்லையற்ற பாசம் வைத்திருக்கும் ஆச்சி, அவனது உடல்நலத்திற்குக் காரணம் செய்வினையோ அல்லது சூனியமோ என்று நம்பி மூக்கையாவின் திண்ணை வரை அவனை இழுத்துச் செல்கிறாள். குடும்பப் பாசமும் அறியாமையும் இணைந்து எளிய மக்களை எப்படி ஏமாற்றுக்காரர்களின் கைகளில் ஒப்படைக்கின்றன என்பதை இது காட்டுகிறது.
கதையின் உச்சக்கட்டத் திருப்புமுனையாக, மூக்கையா தனியறையில் தங்கப்பாண்டியை விசாரிக்கும் பகுதி அமைகிறது. வெளியுலகத்திற்கு மாயம் செய்பவனாகத் தோன்றும் மூக்கையா, அறைக்குள் எளிய மனிதனாகத் தன் வாழ்வை இழந்த பாமரனாக உண்மையை ஒப்புக் கொள்கிறான்.
“எப்படி ஆச்சு தெரியுமா? உனக்கு வாய்ச்ச மாதிரிதான் எனக்கும் ஒருத்தன். அவந்தான் சாராயம் குடிக்கப் பழக்கினான்… பார்டர் தாண்டுற அளவுக்கு இருந்த உடம்பு இப்ப பாத்ரூம்கூடத் தனியா போவ முடியாது”
தன் கால்களை இழக்கக் காரணமான அந்தத் தவறான நட்பு எத்தகையது என்பதை அவன் தங்கப்பாண்டியிடம் பகிர்ந்து கொள்ளும் விதம் நெகிழ்ச்சியானது.
வெளியில் தான் செய்யும் ‘தொக்கம்’ என்பது வெறும் கைவரிசையும் உதவியாளர்கள் மூலம் முன்கூட்டியே சேகரிக்கப்படும் துப்புகளுமே தவிர வேறில்லை என்பதை மூக்கையா வெளிப்படையாக ஒப்புக்கொள்கிறான்.
“ஆம்பளைப் பசங்களைக் கூட்டாளியா சேக்கறச்சே கவனமா இருக்கனும்யா. ஒர்த்தன் நம்மளை மலை மேல ஒசத்தி வச்சிடுவான் அதேசமயம் இன்னொருத்தன் பாதாளத்துல தள்ளி வுட்ருவான்” என்ற மூக்கையாவின் அறிவுரை, வெறும் கதைப்பாத்திரத்தின் வசனமன்று; அது ஒட்டுமொத்த இளைய சமூகத்திற்கும் சொல்லப்படும் வாழ்வியல் பாடமாகும்.
மூக்கையாவின் எச்சரிக்கையும் அவனது பரிதாபகரமான நிலையும் தங்கப்பாண்டியின் மனத்தில் மாபெரும் தாக்கத்தை ஏற்படுத்துகிறது.
தனக்கு வந்த வயிற்றுவலி கஞ்சாவாலும் சிகரெட்டாலும் வந்தது என்பதைப் புரிந்துகொள்ளும் அவன், மூக்கையா காட்டிய அந்தக் கறுப்புப் புடலங்காய் போன்ற கால்களின் கோலத்தைக் கண்டு நடுங்குகிறான்.
தனக்கும் அந்த நிலைமை வந்துவிடக்கூடாது என்ற பயமும் வாழ்க்கையைச் சீராக வாழ வேண்டும் என்ற தெளிவும் அவனுக்குள் ஏற்படுகிறது. தலைசுற்றல் விலகி அவனுக்குள் ஏற்படும் மனத்தெளிவு, ஒரு சிறுவன் தவறி விழுந்த குழியிலிருந்து மீண்டு வருவதற்கான முதல் படியாகும்.
எழுத்தாளர் நெய்வேலி பாரதிக்குமாரின் ‘தொக்கம்’ என்ற இந்தச் சிறுகதை, பதின்பருவத்துச் சிறுவர்களின் உளவியல் சிக்கல்களையும் போலி ஆன்மிகத்தின் முகமூடியைக் கிழித்துச் சொல்லும் சமூக யதார்த்தத்தையும் சிறப்பாகப் பதிவு செய்துள்ளது.
தனிமனித வாழ்வியலின் வீழ்ச்சியையும் அனுபவத்தின் மூலமாக மனிதன் பெறும் தெளிவையும் அழுத்தமாகப் பேசும் இக்கதை, இன்றைய பெற்றோர்களும் இளைஞர்களும் வாசிக்க வேண்டிய முக்கியமான படைப்பாகும்.
– – –